Addysg a sgiliau

Mae addysg a datblygu sgiliau yn cynnig cyfle gwych i greu newid yng Nghymru. Trwy roi cyfle i fenywod sydd wedi’u heithrio o fyd gwaith ddysgu sgiliau newydd, chwarae rolau gwahanol a dringo ysgol gyrfa, byddai rhan enfawr o’r boblogaeth yn weithgar yn economi Cymru am y tro cyntaf.

Mewn cydweithrediad â phwyllgor Addysg a Dysgu Gydol Oes y Cynulliad Cenedlaethol, Cyngor Cenedlaethol - ELWa a llu o gyrff eraill, mae Chwarae Teg yn helpu i chwalu’r rhwystrau sy’n wynebu menywod sydd eisiau datblygu’u sgiliau a chael gafael ar gyfleoedd hyfforddi a gwaith.

Mae rhwystrau megis darpariaeth gofal plant annigonol, amserlenni nad ydynt yn deg i’r teulu, cludiant a chostau yn esbonio pam na all llawer o fenywod fynychu nifer o gyrsiau hyfforddi. Mae Chwarae Teg yn ymgyrchu ar ran y sawl sydd wedi’u heithrio o fyd addysg ac yn codi proffil y materion hyn gyda’r bobl a all wneud gwahaniaeth.

Trwy gyfrannu i’r broses benderfynu, gall Chwarae Teg ymgyrchu dros gydraddoldeb yng nghamau cyntaf y broses gynllunio a herio’r stereoteipiau sy’n ffurfio ym meddyliau plant o oed cynnar.

Trwy gomisiynu gwaith ymchwil ac adeiladu partneriaethau gyda chyrff diwydiant pwysig, mae Chwarae Teg yn codi proffil yr anghydraddoldebau sy’n bodoli ym maes addysg a hyfforddiant ac yn sicrhau bod llunwyr barn a llunwyr penderfyniadau yn gwbl ymwybodol o’r ffeithiau a’u bod yn barod i newid a hyrwyddo cydraddoldeb mewn addysg i bawb.

Linciau Defnyddiol

ELWa
Gyrfa Cymru

Amdanom ni | Prif themau | Newyddion a digwyddiadau | Ymchwil | Aelodaeth | Swyddfeydd | Cysylltwch â ni | Map y wefan | Swyddi

Hafan | English