Ar ôl cyflawni cwrs Cenedl Hyblyg, cafodd Andrea’r hyder i ddal ati ac i wireddu ei breuddwyd o raddio yn y gyfraith. Yn ystod ei hastudiaethau, cafodd ei gwobrwyo am ei chyfraniad rhagorol ac mae ar fin cwblhau cwrs gradd MA mewn Cyfraith Gymhwysol a Throseddeg. Yn ogystal, daeth hefyd o hyd i amser i redeg y Clwb Cyfeillgarwch i fenywod ag anableddau.

Bydd 2019 yn flwyddyn arbennig i mi, am weddill fy mywyd. Roeddwn i wedi bod yn fyfyriwr aeddfed yn astudio’n llawn-amser ym Mhrifysgol Abertawe am y pedair blynedd flaenorol. Ar ôl gadael yr ysgol yn 16 oed a dod yn fam, yn 49 mlwydd oed cofrestrais i astudio am radd LLB y Gyfraith.

Dyna oedd fy mreuddwyd, ond roeddwn i’n credu ers amser maith mai breuddwyd yn unig fyddai hi; allwn i ddim ailddechrau astudio ar ôl 33 mlynedd, allwn i? – Pam lai? – does dim pen draw i wireddu eich breuddwydion! Ym mis Gorffennaf 2018 graddiais gyda gradd (Anrh) 2.1 yn y Gyfraith a fi yw’r fenyw falchaf ar wyneb y ddaear.

Ym mis Ebrill 2019 cefais e-bost yn datgan fy mod wedi cael fy enwebu am wobr Womenspire, ac roeddwn yn meddwl mai jôc oedd y neges i ddechrau. Roeddwn i wedi bod yn dilyn y gwobrau ers tair blynedd, ac wedi darllen straeon pob enillydd blaenorol. Freuddwyais i erioed y byddwn i’n rhan o’r gwobrau, er i mi ddymuno hynny droeon.

Mae Chwarae Teg yn sefydliad unigryw ac arbennig iawn, ac mae’n agos iawn at fy nghalon. Y sefydliad hwn a’r cyfleoedd gwych mae’n eu cynnig i ferched, a roddodd fi ar ben y ffordd gyda fy siwrne ddysgu, ac a wnaeth i mi gredu y gallwn i gyflawni mwy. Rhoddodd y cwrs Arwain a Rheoli i ferched, Cenedl Hyblyg gyfle i mi werthuso fy rôl yn y gweithle a thrwy gynllunio datblygiad gyrfa, ailsbardunodd fy mreuddwyd i astudio’r gyfraith.

Ar 4 Gorffennaf, 2019 roeddwn i’n paratoi at y Gwobrau Womenspire oedd yn cael eu cynnal yn Amgueddfa Werin Sain Ffagan. Roeddwn i’n ofnadwy o nerfus a ddim yn meiddio credu y gallwn ennill y wobr. Gwyddwn fod bod yn rhan o’r achlysur arbennig hwn, yn dathlu llwyddiannau anhygoel merched o wahanol gefndiroedd, yn fraint ynddo’i hun. Roeddwn i wedi dweud wrth y byd a’r betws fy mod wedi cael fy enwebu, ac wedi darllen straeon y tair merch anhygoel arall oedd wedi cyrraedd rhestr fer fy nghategori dysgwr i. Roedd tipyn o gystadleuaeth, byddai unrhyw un ohonynt yn enillydd haeddianol iawn. Doeddwn i ddim yn deall sut bod astudio’r gyfraith, pwnc roeddwn i’n ei garu ac wrth fy modd yn ei astudio, yn cymharu â’u llwyddiannau nhw. Serch hynny, roeddwn i’n edrych ymlaen yn arw at fynd i’r seremoni a mwynhau pob eiliad o fod yn rhan o’r digwyddiad anhygoel hwn.

Roedd yn bopeth yr oeddwn i wedi’i ddychmygu, a mwy. Roedd cerdded at y fynedfa yn deimlad arbennig iawn, roedd pawb yn edrych mor smart ac roedd yr awyrgylch yn drydanol. Roedd cael bod yng nghwmni merched arbennig, neilltuol iawn yn un o lwyddiannau mwyaf fy mywyd. Fyddwn i ddim yn hoffi beirniadu’r gwobrau, mae’n rhaid ei bod yn dasg anodd tu hwnt. Roeddwn i wedi bod i gyfweliad gyda’r panel beirniadu fel rhan o’r broses benderfynu, ac roedden nhw’n ardderchog.

Roeddwn i mor nerfus, ac mae hynny’n gwneud i mi siarad gormod a chwerthin fel het. Ond mae’n rhaid eu bod nhw wedi sylweddoli hynny, a buon nhw’n siarad ac yn chwerthin gyda mi – roedd yn teimlo fel sgwrsio â chriw o hen ffrindiau – y beirniaid gorau erioed. Diolch i chi am fy ngalluogi i fod yn ddealladwy ac i adrodd fy stori.

Roedd teimlad gwyl ar noson y gwobrau, ac roeddwn i’n temlo fel celeb go iawn. Roedd cymaint o fwyd ar gael, a digon o ddewis. Mae cymaint i’w weld yn y lleoliad fel yr hedfanodd yr amser – yn rhy gyflym, doeddwn i ddim eisiau i’r noson ddod i ben. Eisteddon ni i wylio’r gwobrau’n cael eu cyflwyno ac i fod yn onest, roeddwn i eisoes yn teimlo fel enillydd. Bod yn rhan o’r noson arbennig, bod yno a mwynhau’r holl brofiad. Roedd yn un o’r troeon prin hynny pan nad ennill oedd yn bwysig, ond y cymryd rhan.

Gwrandawais yn astud ar bob categori ac roeddwn i’n rhyfeddu at yr hyn yr oedd y merched arbennig yma’n ei gyflawni. Merched cryf, penderfynol, clyfar ac annibynnol, oedd yn gwneud i mi deimlo’n falch o fod yn eu cwmni. Daeth hi’n amser am y categori dysgwr a daeth fy fideo i ar y sgrîn. Dyna ble’r oeddwn i’n chwerthin fel het ar y sgrin, yn siarad am astudio’r gyfraith. Petawn i ond wedi gallu edrych yn ddeallus, ac addewais i mi fy hun y byddwn yn mynd ar ddeiet ar unwaith – ond doeddwn i ddim yn meddwl fy mod wedi ennill… a’r enillydd yw ANDREA GARVEY, prin y gallwn i sefyll.

Cerddais i’r llwyfan gan deimlo mor falch ohonna i’n hun – dyma pryd y teimlais nad dim ond astudio pwnc roeddwn i’n ei garu oeddwn i wedi’i wneud, ond ei fod wedi bod yn llwyddiant mawr, a mwynheais bob eiliad. Am noson fythgofiadwy!

Gorffennais fy MA ym mis Hydref 2019 a dyma ni. Mae astudio’r gyfraith wedi fy newid i. Dyna’r peth gorau wnes i erioed, ac rydw i’n teimlo fel menyw anhygoel. Rydw i eisiau gweithio ym mhroffesiwn y gyfraith a bod yn fenyw sy’n cael ei pharchu gan ddynion, ac yn cael ei hystyried yn gydradd. Rydw i eisiau ysbrydoli merched eraill i gredu y gall eu breuddwydion ddod yn wir – peidiwch byth â meddwl ei bod yn rhy hwyr neu nad oes pwynt – dydy hi byth yn rhy hwyr ac mae bob amser bwynt. Cewch brofi’r un peth â mi – teimlad enfawr o foddhad. I bawb ddywedodd wrthyf i am roi’r gorau i freuddwydio ac ianghofio am y gyfraith, na fyddai fyth yn digwydd – roeddech chi’n anghywir – profais i bob un yn anghywir ac mae’n deimlad gwych.

Mae gen i radd yn y gyfraith ac rydw i’n bwriadu gwneud gwahaniaeth, gan wneud fy ngorau yn y gweithle bob tro. Rwy’n enillydd Womenspire, ac rydyn ni’n disgleirio fel diemwntau er mwyn ysbrydoli eraill.