Enwebiadau'n agor ar gyfer Merched Gwych Cymru

10th May 2021

Mae pobl Cymru’n cael eu hannog i hyrwyddo menywod mwyaf ysbrydoledig y genedl wrth i Chwarae Teg agor yr enwebiadau ar gyfer eu gwobrau Womenspire 2021.

Mae’r elusen cydraddoldeb rhywedd yn cynnal y dathliad i gydnabod ac amlygu llwyddiannau a chyfraniadau menywod nodedig o bob cefndir.

Nawr yn eu chweched flwyddyn, bydd y gwobrau’n cael eu cynnal ar-lein am yr ail flwyddyn yn olynol, oherwydd Covid -19, ond unwaith eto, maent yn siŵr o ddarparu noson wefreiddiol o straeon ac adloniant ysbrydoledig.

Mae ffrydio byw drwy dudalen Facebook ac ar Twitter ITV wedi sicrhau y bydd gan y digwyddiad gynulleidfa o filoedd ym mhedwar ban byd. Cynhelir y digwyddiad Ddydd Iau 30 Medi, ac fe ddyfernir gwobrau i fenywod yn y categorïau canlynol:

  • Hyrwyddwr Cymunedol
  • Menyw mewn Chwaraeon
  • Seren Ddisglair
  • Dysgwr
  • Entrepreneur
  • Arweinydd
  • Menyw mewn STEM
  • Aelod o Fwrdd
  • Menyw mewn Iechyd a Gofal
  • Pencampwraig Womenspire 2021

Bydd dau gategori hefyd ar gyfer sefydliadau a busnesau sy’n ymroddedig i gydraddoldeb rhywedd ac yn darparu’r cymorth sydd ei angen er mwyn i fenywod lwyddo a ffynnu:

  • Hyrwyddwr Cydraddoldeb Rhywedd (ar gyfer unigolyn)
  • Cyflogwr ChwaraeTeg ©

I wneud enwebiad ar gyfer Gwobrau Womenspire 2021 neu i gael rhagor o wybodaeth ewch i https://chwaraeteg.com/gwobrauwomenspire. Mae’r enwebiadau’n cau am hanner dydd, ddydd Llun 21 Mehefin.

Mae Womenspire yn seremoni wobrwyo unigryw sy'n dathlu ac yn arddangos talentau, angerdd a chyflawniadau menywod yng Nghymru, ac yn ceisio ysbrydoli cenedlaethau'r dyfodol. Gweithiodd cystal fel digwyddiad rhithiol y llynedd fel y gwnaethom y penderfyniad yn syth i gynnal y digwyddiad ar-lein unwaith eto– a’i wneud yn fwy ac yn well nag erioed!
"Rydym am glywed am gynifer o fenywod arbennig o bob cwr o'r wlad ag sy'n bosibl, sydd wedi gwneud gwahaniaeth gwirioneddol i'w bywydau eu hunain a bywydau pobl eraill. Rwy'n annog pobl o bob cwr o Gymru, sy'n adnabod menyw ysbrydoledig neu fusnes sy'n mynd i’r eithaf, i fynd ati i enwebu. Mae'r holl fanylion ar ein gwefan gan gynnwys y ffurflen enwebu sydd yn hawdd iawn i'w llenwi! "
Cerys Furlong
Prif Weithredwr Chwarae Teg

Roeddwn i wrth fy modd bod fy ngwaith yn cael ei gydnabod yn Womenspire 2020 ac i gael rhannu llwyfan gyda chymaint o fenywod haeddiannol. Roedd yn llawer o hwyl, ond hefyd rhoddodd gyfle i mi hyrwyddo fy ngwaith o gefnogi teuluoedd sy'n delio ag Awtistiaeth i gynulleidfaoedd newydd. Rwy'n gobeithio y bydd y cyhoedd yn enwebu'r menywod arbennig y maent yn eu hadnabod gan y bydd y gydnabyddiaeth yn gwneud gwahaniaeth gwirioneddol i'w bywydau.
Hazel Lim
Enillodd Hazel Lim, ymgyrchydd codi ymwybyddiaeth i awtistiaeth a sylfaenydd Grŵp Cymorth Awtistiaeth Tsieina, Wobr Hyrwyddwr Cymunedol a theitl Pencampwr Womenspire 2020

Fe’m synwyd yn llwyr ond roeddwn wrth fy modd o gyrraedd rownd derfynol Womenspire, heb sôn am ennill! Roedd holl brofiad Womenspire yn un na bythgofiadwy, gan gynnig cyfleoedd newydd i mi a'r busnes, ac roedd hyn yn hollol wych. Byddwn yn annog pawb i ddarganfod mwy, i enwebu ac i gymryd rhan.
Sian Cartledge
Enillodd y Wobr Entrepreneur yn 2020 fel sylfaenydd Max Rocks, busnes sy'n dylunio ac yn cynhyrchu adnoddau dysgu, cardiau ac addurniadau ag iddynt thema Cymreig

Mae'n bleser gennym unwaith eto i fod yn bartneriaid cyfryngau swyddogol Womenspire 2021. Yr hyn sy'n ennyn ein hedmygedd gwirioneddol yw nad oes gan lawer o'r menywod unrhyw syniad pa mor wych ydyn nhw felly mae'n gyfle arbennig i ni allu rhannu eu straeon.

Yn ITV Cymru Wales rydym yn ymdrechu i sicrhau cydraddoldeb rhywedd ac amrywiaeth ymhlith cyfranwyr i'n rhaglenni a hefyd i adlewyrchu hyn yn ein gweithlu. Drwy wneud hynny gallwn greu cynnwys sydd yn berthnasol i'n cynulleidfaoedd a gweithle sy’n ffynnu oherwydd creadigrwydd a chynhwysiant.
Zoe Thomas
Golygydd, Rhaglenni Saesneg, ITV Cymru